Ha ka jingim u briew kiei kiei kim ju sah kumjuh bad kim ju neh ha juh hynrei ki iaid ryngkat bad ka jingkylla ka por. Haba bishar bniah, ngin shem ba ka jingkylla ka por ka ktah ia ka jingim u briew ha kiba bun ki bynta bad kawei na kita ka long ka jingioh sa kawei pat ka snem ban nang kyntiew ia ka rta jingim jong u. Kumta ngi iohi ia ka jingsan jong u briew ha man la ki bynta jong ka jingim haba u jam na ka jinglong khunlung sha ka jinglong khynnah, na ka jinglong khynnah sha ka jinglong samla, na ka jinglong samla sha ka jinglong samla rangbah bad na u samla rangbah sha ka jinglong rangbah syndon  ha shuwa ba un kynjoh sha ka jinglong tymmen. Ha man  ka jingtyllun u snem, kumta ruh u briew u kylla na kawei ka kyrdan jingim sha kawei pat. Kumta haba u snem 2012 u poi noh sha u snem 2013; khlem artatien u briew ruh u poi noh sha kawei pat ka bynta jong ka jingim jong u ryngkat bad ka jingkylla jong ka por la ka long ha ka jingim jinglong doh ne jingim jinglong mynsiem.

Lyngba kitei ki jingkylla ka por, ym don balah ban tip lypa ia kaei ka ban sa wan. Ka Baibl ka iathuh ba u briew um lah ban tip ia kaei ka ban sa long “namar um tip kaei ka ban sa long; namar u ei u ba lah ban iathuh ha u kumno kan sa long”(Ekle. 8:7). Ka jingshisha ka long ba dei tang U Blei Uba tip namar ma U hi U la dep buh ryntih ia kiei kiei baroh na ka bynta u khun bynriew ha kane ka pyrthei. Ha kawei pat ka liang u soitan u ialeh ban pynkylla khongpong ia ki jingbuh beit buhryntih jong U Blei da kaba u pyndonkam hi da u briew kum u atiar jong u ban ialeh pyrshah ia ki jingbuhryntih jong U Blei kumba ka la jia ha ka kper Eden. Ia ka mariang ruh la buhryntih da U Blei na ka bynta ka jingsuk u briew hynrei u briew u pynkylla khongpong ia kata da kaba u pynjot noh ia ka. U Blei U la buh ia u briew ba un ioh ia ka rta kaba biang ha kane ka pyrthei hynrei u briew hi uba pynlyng kot ia la ka rta la jong namar u hap noh ha ki jingpynshoi ba bun jong u bymman. Ka Baibl ka kren shai”wat long u bymman than eh, lymne wat long uba bieit; balei men shu iap shuwa ka por jong me”(Ekle. 7:7).

Namarkata, to ai ba ka jingkylla ka por na uwei u snem sha uwei pat, kan wan rah ruh ha ngi ia ka jingkylla ha ki jingmut jingpyrkhat jong ngi bad kum ba ngi nang san bad nangiaid ki snem ki rta ha ka jingim jong ngi, kumta ruh to ai ba ngin nangsan ha ka jingim jinglong mynsiem ha ka jingiadei jong ngi bad la U Kynrad. Hooid, ngim lah ban pynneh hajuh ia kiei kiei haba ki snem bad ka por pat ki nangtyllun, kumta la da ngi dei ban iatyllun lang bad kane ka por, ngi ruh ngi dei ban tur shaphrang ban beh sha pyrshah ka dak, ym ban shu neh ha ka juh ka jaka. Ngi ju ong ba ngi dei ban iaid kat kum ka por, hynrei sngewsih pat ban ong ba wat la u snem uba thymmai u la wan hynrei ngi pat ngi dang sah hi ha ka jinglong barim bad ym iohi dak ei ei ba ka jingkylla ka por ka don jingktah ei ei ia ngi. Kato ka ‘jingong’ ba ka barim ka leit noh ban ai jaka ia kaba thymmai, imat ka iadei tang haba ngi bujli kalendar ha la ïing namar ka jaka barim ba ju don kalendar 2012 la don mynta da ka kalendar 2013.

Haba ngi phai sha la ka jingim, ngi shem ba ka don ka jingthrang ban nangiaid thymmai shuh shuh sha ka jingiadei ba thymmai  bad la U Kynrad. Ka Baibl ka ong “kumta lada uei uei ruh u don ha u Khrist, u long u jingthaw ba thymmai; kiei kiei ruh kiba rim ki la duh noh, ha khmih kiei kiei baroh ki la jia long kiba thymmai” (2 Kor 5:17). Kumta ka jingkhot lang ia ngi ka long ban ai jaka thymmai ia U Trai bad U Nongpynim jong ngi U Jisu Khrist ba un thaw thymmai ia ngi ha ka jingim ba kynja mynsiem jong ngi haba ngi shakri bad mane ia U.