Uwei u khynnah rit u la kop ia ki paralok ba um ju tieng iano iano. Ban pynshisha ia kata, ki paralok ki la ong ba un pynshisha da kaba thiah marwei ha ka khlaw kaba don marjan. U khynnah u la leit ban iathuh ha u kpa ia kata ka jingthmu jong u. Ha kaba nyngkong u kpa um shym la shah, hynrei hadien ka jingpynbor, u la shah bad u la leit ryngkat ruh ban pynrah ia ki nep bad jain kup. Haba ka miet ka la wan, u khynnah u la sdang ban tieng, namar ki jingpah ki mrad khlaw. Baroh shi miet u lynga- u pisa ha trai dieng, hynrei ha shuwa ban kynjat shai, u la iohthiah noh namar ba shoh eh ka jingsam thiah. Ynda step u kpa u la wan kylli ia u, la u iohthiah bha baroh shimiet. U Khynnah ruh u la jubab ba u la iohthiah. U Kpa u phai ktien bad iathuh ba baroh shimet u don ha lyndet u dieng ban peit ia u, bad u iohi ia ka jinglynga bad iohsngew ia ka jingud tieng. U Khun haba u la iohsngew ia kata, u la ong “Ah ba ngan da tip ba phi don hajan, ngan jin la iohthiah bha baroh shimiet”.

Ha ka Testament Barim,U Blei U don bad la ki briew jong U ha baroh ki por.Ka jingdon U Blei ha ka jait bynriew Israel ka dei kaba pyniapher ia ki na kiwei ki jait bynriew (Jingkhein 14:14). Wat kiwei ruh tip bad ki iohsngew ia kane. Man ka sngi, U Trai U iaid ha shuwa ki briew da u rishot lyoh mynsngi bad lyoh ding mynmiet. Kane ka jingialam ka la neh sawphew snem ha ka jingiaid jong ki ha ri khlaw (Eksodos 13:21-22). Ym don kiwei pat ki blei kiba lah ban ialam kum U Trai. Namar ka jingleh pyrshah jong ki, haba ki la shna ia u khun masi ksiar, U Blei U la sngewsih ia ka jingleh jong ki, bad U la ong ia u Moses ba “Ngan phah ia u angel jong nga ha shuwa jong me”(Eksodos 33:2) Namar nga ngan ym leit kiew ryngkat hapdeng jong me; naba me u paidlang baeh ryndang:ba ioh ngan pynduh noh khoit ia me ha kata ka lynti (Eksodos 33:5), hynrei u Moses ha ka jingduwai jong u ia U Blei u la kyrpad “Lymda leit ka khmat jong me lem bad ngi, te wat ialam shuh ia ngi nangne”(Eksodos 33:15), ha kane ka jingkyrpad, U Blei U la jubab “Ngn leh ia kane ruh ia kaba me la kren me la ioh shem ka jingsngewbha ha khmat jong nga, bad nga ithuh ia me da ka kyrteng” (Eksodos 33:17). Kum kane ka la jia ruh ha u syiem Dabid hadien ba u la leh pop, u la hap ban kyrpad ia U Blei ba un ym bred noh ia u, na khmat jong U(Salm 51:11).

Ki jingkular U Trai ha ka jutang barim(Testament barim), ki iai bteng lyngba ki nongiathuhlypa jong U. U Isaiah u pynkynmaw ia ki khun Israel ba Un leit ha shuwa bad Un da na shadien. “…Namar U Trai un leit ha shuwa jong phi, bad U Blei ki Israel un long u nongda ia phi na shadien” (Isaiah 52:12).

Ha Isaiah 40:11 un kdup ha ka shadem “Un bsa ia ka kynhun jong u kum u nongap langbrot, ha ka ksangti jong u, un lum ia ki khun langbrot, bad ha ka shadem jong u un rah ia ki…”.

Ha ka Salm 91:1,4 U Trai U kular ba Un kah bad Un ai ka jingiada na jrong. “Uta uba shong ha ka jaka barieh jong U Bahakhlieh tam eh, un ioh iaineh hapoh ka jingkah jong U Badonbor baroh…Un tap ia me da la ki sner, bad hapoh ki thapniang jong u men ioh rieh ia lade”.

Kumta ha ka Testament barim, ka jingda ia ki briew jong U ka la long ha baroh ki liang. Hynrei ha ka jingiohi jong U, kata kam pat biang Donkam ban leh sa kawei ka ka ban pynjanai ia kata ka jingdon jong U. Ia kane Un pynpaw ha ka Jutang bathymmai (Testament bathymmai). Lyngba kane ka jutang kaba bad U Khun jong U, Un leh ia ka kam kaba phylla tam. Kata ba Un wan shong syndon hapoh jong kito kiba ngeit. Kumta ka ktien U Blei ka ong “..Ngan shong sah hapoh jong ki;ngan long U Blei jong ki ruh, ki ruh kin long u paitlang jong nga” (2 Korinth 6:16), bad ruh “U Khrist ha phi” (Kol 1:27). Bad U Trai U ong “Ngan ym iehnoh noh ia me da lei lei, lymne ngan ym leh lyndet noh ia me da lei lei”(Heb.13:5).
Ki synran U Trai haba ki la ioh ia kane ka jingshisha, ki la long shlur haduh ba ka jingiap ne kano kano ka nongshun kam lah shuh ban ieng pyrshah ia ki.

Ki nongbud U Khrist haduh mynta ki lah ban rwai –
Nga ngeit, nga ngeit, Jingpynim b’U aiei,
Kumno nga tip b’U Trai U im- U im hapoh jong nga.