‘Suk uta uba pule, bad kita kiba iohsngew ia ki ktien jong kane ka jingiathuhlypa bad kiba sumar ia kita kiei kiei ruh ia kiba la thoh ha ka, namar kata ka ïa ka la jan’ (Jingpynpaw 1:3)
‘Ha khmih Nga wan kloi : suk uta uba iai sumar ia ki ktien jong ka jingiathuhlypa kane ka kitab ‘(Jingpynpaw 22:7).

U nongthoh ia kane ka kitab Jingpynpaw u dei U Jisu Khrist. U Trai U thmu ba ia kane ka kitab dei ban pule bad ïit bniah da ki briew jong U (Jpw 1:3). Kam dei satia ka kitab ba la khang ka bym lah sngewthuh ban pule kumba kiba bun ki pyrkhat, hynrei kaba lah ban plie (Jpw 22:10). Kam dei ka kitab kaba dum. Ka kyrteng jong kane ka kitab – ‘Jingpynpaw ’ ka wan na ka ktien greek apocalypsis kaba mut ‘ kaba pynpaw ’.

Ym tang ba kane ka kitab la khot kyrteng Jingpynpaw ban pynshlur ia ngi ban pule ia ka, hynrei ka dei tang ma ka ka kitab ha ka Bible kaba U Blei U da kular ia ka jingkyrkhu kaba kyrpang ia kito kiba pule bad wad bniah ia ka. To ngin ia pule biang Jpw 1:3

Katba ngi dang pule, ngi kynmaw ia kine ki saw tylli kiei kiei :
1. Ka kitab Jingpynpaw kam dei satia ka kot kaba dum.
2. Ia ka jingkyrkhu kaba kyrpang la kular ha kiba pule ia ka.
3. Ka dei ka kitab iathuhlypa.
4. Ka dei ka jingpynpaw ia U Jisu Khrist. U long ka jingthew jong kane ka kitab, ka pdeng bad ka jingdap ba pura. Ka don jingiasoh bad ka jingwan kaba khadduh U Khrist.

KI LAI BYNTA JONG KA BALANG
Ngin iapeit ia ki Hynñiew Balang kiba don ha ka Kitab Jingpynpaw 2 bad 3 lynnong. Ka long kaba suk ban sngewthuh haba ngi pule ter ter ia ki –
1. Ephesus
2. Smyrna
3. Pergamos.
4. Thyatira
5. Sardis
6. Philadelphia
7. Laodikaia

Kine ki hynñiew Balang la khot ruh ki ‘diengpynieng sharak’ ha ka lynnong 1, bad U Jisu Khrist la iohi ha kaba sdang, Uba iaid hapdeng jong ki.

KI JINGBATAI

Ki don shibun ki jingbatai ia ki jingmut jong kine ki hynñiew Balang ha ka kitab Jingpynpaw.

1. Ngi ngeit ba ki ieng na ka bynta ki hynñiew tylli ki Balang kiba don ha ka por u Ioannis.

2. Kine ki hynñiew Balang ki long ruh ka dur jong ki hynñiew tylli ki Balang kiba iapher ha kane ka por kaba mynta. Ki don ki Balang kiba syaid bad kiba shit kum ka Balang ha Ephesus bad kiwei pat kiba khriat bad kiba iap kum ka Laodikaia. Kiwei kum kum ka Thyatira kiba dap da ki jingleh ñiam bad kiwei kum ka Sardis kiba sahkut ha ki jingpyndep rukom.

3. Kumba kane ka dei ka kitab iathuhlypa, bad ba ka ïa kaba mynta ka la jan kut, ngi lah ban phai bad iohi ba kine ki hynñiew Balang ki long ka dur jong ka Balang kaba nang iaid shaphang na ka jingwan ba nyngkong sha ka jingwan ba arsien U Khrist.

Ka Ephesos ka dei ka Balang jong ka spah snem kaba nyngkong.
Ka Smyrna ka dei ka Balang kaba shah pynshitom jong ka spah snem kaba ar bad kaba lai.
Ka Thyatira ka ieng na ka bynta ka Balang jong ki por kiba dum.
Ka Sardis ka Balang kaba la kha thymmai bad iai-pynkylla.
Ka Philadelphia ka Balang jong ka revival jong ka spah snem kaba khad-khyndai.
Ka Laodikaia ka Balang jong ka ïa kaba kut, ka por ka jingphaidien.

Ka jingbatai kan dang bteng ha ki issue kiban wan .

( The main reference is from ‘Studies in Revelation’ da u M R De Haan, 1946 ).