Baroh ngi ia tip bha kumno u khñiang uba treng, uba sniew dur, u sop ialade ban mih pat kum ka thapbalieh kaba itynnad. La khot ia kane ka jingkylla ka “metamorphosis”, kaba mih na ka ktien Grik.

Ki riewstad ki ong ba ha ka Shithi sha ki nong Rom 12:1-2, u Paul u kren ia kaba kum kane ka jingpynkylla dur, ka “metamorphosis”, kaba long ka jingiaid lynti lane ka ‘process’ kaba uta uba la ioh map u donkam ban iaid lyngba. Shuh shuh, ki ong ba kane kam dei ka jingkylla kaba rit ne shipor, kam dei ruh kaba tang ha kaba paw, hynrei kaba khraw, kaba neh, kaba pynlong ia uta uba kylla ban long da kumwei pat. Kam dei tang ka ‘practice’ ne jingleh / jingmlien, hynrei ka “being”, ka jinglong tynrai hi.
Balei ka donkam ia ngi ban long kiba la pynkylla dur ?

1. Ba ngin tip ia ka mon U Blei: 2 Kor 4:4 ka iathuh ia ngi ba don uba kah ia ki briew na kaba iohi ia ka burom U Blei bad haba ki briew ki mad bad iohi ia ka jingshai ka Gospel, la weng noh ia kata ka jingkah na ki, hynrei kine ki dang donkam pat ban iaid lyngba ka process jong ka jingpynkylla dur, na u khñiang shaduh ka thapbalieh, tad haduh ba kin shem ia ka mon U Blei. Namar haba ki shem ia ka mon U Blei, ki shem ia ka jubab ia ki jingkylli kiba khraw tam ha ka pyrthei. Kane ka jubab ia ki jingkylli kum, ‘kaei ka jingmut jong ka jingim’? Ka lah ban long shimet lane ka lah ban thew ia ka jingim jong u bynriew baroh ha ka pyrthei. ‘Kaei ka lawei, lane ka ‘destiny’ jong ngi’ ? ‘Kaei ka lawei jong ki khun ki kti jong ngi’ ? ‘Hato ka jingim ka shong ha ka bok’? ‘Kumno ngin sngewthuh ia ka mon U Blei ha kine ki jingiakynduh ki jong ngi ha kane ka jingim, mynta’? Ngi donkam ia ka jingmut ba la pynkylla dur ba ngin lah ban iohi ia kiei kiei na ka liang U Blei, na ka ‘perspective’ ba kynja Blei. Haba ngi shem ia ka jingthmu U Blei, ngin long kiba dap ka jingsngewskhem, ka jingsuk namar ngi iohi ia kiei kiei baroh ha ka rukom ka jingmut U Blei.

2. Namar U Blei U long Uba khuid: U Blei U long Uba khuid bad ka jingbymkhuid kam don jaka satia ha U bad ha ka hima jong U (1 Ioan 1:5; Jingpw 21:27). Ngi im ha ka pyrthei jong ka rong bthuh, kaba ki briew ki kham sngewtynnad ia ka ‘grey area’ lane ka ‘jaka pdeng’. Shane ruh em shatai ruh em bad ka long kaba suk ban shah tan sha ka lynti pdeng. Ka suk ban long ki Khristan kiba leit jingiaseng, wat ban kit ia ki kam ka Balang katba ha ki jingtrei, ki jingiadei, ha iew ha hat, ha ka imlang sahlang, ki ktien, ki jingiakren, ki akor jong ngi pat, ngi pynpaw ba ngi jngai na U Blei. Ngin ym lah ban poi sha ka hima U Blei bad ki pop kibym pat phla ne ioh map. Ngim lah ban poi sha ka hima U Blei lem bad ki jingkit ka pyrthei kiba ngim pat lah ban pyllait. Lada ka dei ia ngi ban don bynta ha ka hima jong U, ngi dei ban mad ia kane ka jingpynkylla dur, namar ka jingmap ka lah ban long shisien, katba ka jingpynkylla dur ka long ka ‘process’.

3. Namar ngi long ki khun U Blei: Ki khun ki shim ia ki jinglong na ki kmie ki kpa jong ki. La ai ha ngi ka bor ban long ki khun U Blei (Ioan 1:12), kaba mut ba kata ka bor ka long ‘available’ ia ngi ban shim ba ngin ioh long khun U Blei. Ka bor ban im kum ki khun U Blei. Ka bor ban phong ne don ia ka DNA, lane ka jinglong tynrai jong u kpa jong ngi. Bad lada ïit jylliew ia nga bad ia phi, dei ban shem ba ngi shim ia ka jinglong tynrai u kpa jong ngi. Ngi dei ban khong ia U. Ban kup ia kane ka kyrdan bad ban im kum ki khun U Blei, donkam ia kane ka jingpynkylla dur, kaba naduh napoh bad kaba paw shabar, ym tang ka jingleh mynleh.
Kum ki khun, ngi kup bad ngi kit ia ka burom u Kpa, 24 kynta la 7 sngi (24×7), kaba mut man ka minit jong ka jingim jong ngi. Ka dei ia ngi ban im, ban iaid ban ieng, ban trei ban ktah kum kiba idei ban kit ia kane ka jingkup.

4. Namar ka Hukum kaba khraw tam : Math 22:37-38, ka khot ia ngi ban ieit ia U Blei da la ka mynsiem, ka dohnud bad ka jingmut baroh. Lada ym pat pynkylla dur ia ki jingmut jong ngi, ngin ym lah ban ieit ia U Blei da ka jingmut baroh namar kata ka jinglong kan long ka ‘contradiction’, ka jingpyrshah. Ngin ym lah ban ieit ia U Blei da ka jingmut baroh katba kata ka jingmut ka dang brai ia kiei kiei kiba long ki jingijli ha khmat U Blei. Hynrei haba la pynkylla dur, U Blei U long U kongsan, U ‘priority’, ha ki jingpyrkhat bad ki jingpuson ki jong ngi.

5. Namar ngi long ki “ambassador”: 2 Kor 5:20, ka ong ba ngi long ki nongrah ‘tien syiem, lane ki “ambassador”, kiba mihkhmat, kiba la jied na ka pyrthei ban don ha ka pyrthei ban pynpaw ia uta u Syiem jong ngi. Bad kum ka kamram jong ki nongkit ‘tien syiem, ngi dei ban pynpaw ia ka burom, ka hok, ka jingshisha jong kata ka Hima jong u Syiem. Kane ka long ruh ka jingbatai ia ka kam lane ‘job description’ jong nga bad jong phi. Kane ka pynskhem shuh shuh ba ngi dei ban long ka jingshai bad ka mluh ha ki jaka kiba U Blei U la buh ia ngi ban don (Math 5.14). Ngi long ki ‘ambassador’ ha kita kiba ngi iatyngkhuh bad shem ha ki jingim jong ngi, la ha ka trei ka ktah, ki jaka pule, ha ki shnong ki thaw, ha iew ha hat. Dei ha kine ba la khmih lynti ia nga bad ia phi ban long ka jingshai bad ka mluh. Ban long ka jingpher. Ban pynpaw ba ngi long na kawei pat ka hima.

Lada ka dei ia ka Balang ban jop ia ka shnong Laban sha ka Hima U Blei, kaba nyngkong ka jingdonkam ka long ba ki khun U Blei, kine ki ‘nongrah ‘tien syiem’ ki pynpaw ia U Blei ha kine ki briew kiba na kiwei pat ki jait ki kynja kiba don ha syndah jong ngi. Ka ktien ba ngi kren ha ki jingialap kin ym lah ban rung lada la khang ia ki ban sngap namar ka jingbymiadei dur ki jingim ne jingleh jong ngi na kata kaba ngi ialap. Ngi dei ban long ki nongpyni lynti, ki nongtbeh jingshai jong ka Hima ha kaba ngi long ki “ambassador”. U nongialap u lah ban ialap hynrei ka khubor kaba kine ki briew ki ioh ka long man ka sngi, kata na ki jingim, jinglong bad jingleh jong ngi. Kim pat iohi ia U Jisu Khrist , hynrei ki iashem bad ngi man ka sngi. Ki dei ban iohi ia ki briew ba la pynkylla dur.

Kumta, ka long kaba donkam haduh katta katta ba uwei pa uwei uba wan sha ka jingngeit ha U Jisu Khrist, u dei ban iaid lyngba kane ka jingkylla ‘metamorphosis’, ban kylla na u briew uba rim, kum u khñiang, sha u briew ba thymmai, kum ka thapbalieh. Ka jingkylla ba pura, ym tang kaba na sla.